مين مننا كده معندهاش مشاكل؟؟

مين مننا كده معندهاش مشاكل؟؟
ايلي عايزة تنجح وايلي عايزة تتجوز وايلي عندها مشاكل في جوازها وايلي عايزة تجيب اطفال وايلي اتخرجت ومش لاقيه شغل
كل المشاكل دي محتاجه مين؟
محتاجه الوكيــــــــــل

الوكيل اسم من اسماء الله الحسني محدش فاهم معناه او فاهمين بس مش مستوعبين

لما عروسه تيجي تتجوز المأذون بيسالها مين وكيلك؟
بتقول ايه...وكيلي بابا /اخويا/عمي/جدي/خالي.....
يعني ايه مين وكيلك؟
يعني مين مسؤؤؤؤؤؤؤؤؤؤؤؤؤل عنك

طب تخيلي لما يبقى ربك اسمه الوكيييييل
فدا معناه ايه؟
انه طبعا مسؤل عنك بيتولى مسؤليتك وبياخد بايدك للخير ويبعدك عن اي شر لان الشر مستحيييييييييييل ييجي من ربنا حتى لو حاجه انتي شيفاها شر ربنا بيكون عاملهالك عشان هي الخير ليكي بس انتي مش عارفه حاجه

الواحدة بتفرح كده وتحس بامان لما تلاقي مثلا باباها او اي حد كبير كده حكيم عاقل مسؤل عنها ومعتمده عليه وتلاقي ايلي انتي معتمده عليه دا يقعد يقولك متشيليش هم حاجه طول مانا عايش...صح ولا غلط ؟

طيب ما بالك بقى لما ربنا الملك ربك ورب اكتر واحد انتي بتثقي فيه بيقولك انا وكيلك ...ليه مش واخده بالك مني....ليه مش قادرة تستوعبي ان انا وكيلك مش حد من البشر... ليه مش واثقه فيا دانا ايلي خالقك!!! وانا ايلي اديتك نعمة البصر والعقل والسمع ووو..وانا ايلي خليتك تنجحي في دراسته وتقابلي فلان وتتجوزيه وانا ايلي بايدي اخد منك كلللللللللل حاجه زي ما اديتهالك بسهوله .....
ليه يابنات مش قادرين نحس المعنى دا؟

سبحان الله ممكن تلاقي ربنا قفل في وشك سكه وفتحلك كذا سكه غيرها والله بتحصل

يعني مثلا ربنا ابتلاكي بحاجه صعبه اوووووووي وحسيتي ان الدنيا بقت استغفر الله سودا اوي ومش قادرة تعيشي وتتكيفي وعماله تعيطي وتقولي ليه يارب كده ..لأ عندك ثانية واحده معلش ...لازم تفهمي ان ربنا مستحييييييييييل بسيبك زعلانه وانه قفل طريق في وشك عشان اصلا يفتحلك طريق تاني اخره سعاده ورضا

ربنا اخد منك حاجه غاليه اوووووي عليكي عشان يديكي حاجه احلى يفرحك بيها انتي مستعجله ليه مش يمكن الحاجه ايلي هيديهالك دي تكون الجنه مثلا؟

لازم تحسي يعني ايه توكل على الله

بنسمعها كتيييييييييير بس مش فاهمينها بنقولها باللسان مش بالقلب مع ان العبادة دي اصلاااااااااااا عبادة قلبيييييييييية بحته
التوكل يابنات يعني لما تحسي وتشهدي بقلبك ان مفيش هفوة بتحصل في الكون دا غير وربنا عارفها تخيلي عدد الرمل عدد قطرات المطر عدد اوراق الشجر
مين يقدر يعرف الحاجات دي ..معقول حد من البشر يقدر يعدها؟؟؟

ربنا الوكييييييييييل هو ايلي عارف عددها وعارف كمان لو مثلا حبة رمله اتحركت من مكانها اتحركت كام مللي بالزبط!!!
تخيلي ايه العظمه دي ايه القدرة دي سبحان الله قادر يدير الكون دا كله ..بصي كده للفلك سبحان الله الشمس والقمر والنجوم والكواكب

حاجات لو فكرتي فيها هيجيلك ذهووووووووووول من كتر ماهي ضخمه وصعبه ومعقده اوووووووووي محدش يفهمها غير ربنا ..شوفي حركة الشمس والارض والقمر سبحان الله منظمين ازاي ..حسي بقدرة ربنا شوفي عظمته قادر يحرك الكون كله باللي فيه ...معقول مش هيقدر يدبرلك حاجه ليكي انتي؟؟؟

هتكوني عايزة ايه يعني نجاح راجل تتجوزيه اولاد شغل فلوس عايزة ايه ...عايزة كل دا واكتر..برده قليل هييجي اييييييييه جنب قدرة ربنا وعظمته ايلي شايفينها وحاسينها في الكون كله

تفتكري ايلي قادر يحرك الكون ويعمل كل دا مش هيقدر يبقى مسؤل عنك؟؟ مش هيقدر يحميكي؟؟ مش هيقدر يديكي ايلي انتي عيزاه وايلي ميجيش ابره في بحر من ملكه!!! سبحان الله
لازم تحسي بالكلام دا لانك لما تحسي خلاص هتفوضي كل امرك لله وهتتوكلي عليه وهتبقى متأأأأأأكده انه مش هيعمل فيكي حاجه وحشه وانه مهما عمل خييييييييير ليكي
( قل لمن ما في السماوات والأرض قل لله كتب على نفسه الرحمة)
طيب ردي كده على ربنا في الايه دي :
( قل أرأيتم إن أخذ الله سمعكم وأبصاركم وختم على قلوبكم من إله غير الله يأتيكم به انظر كيف نصرفالآيات ثم هم يصدفون)

يعني لو ربنا اخد منك كل نعمة انتي مش حاسه بيها ..مين يقدر يدهالك تاني غيره؟؟

انا عماله ارغي وعارفه ان فيه بنات منكم مش فاهمين يعني ايه انا متوكله على الله؟؟؟؟
بصي ياست الكل انتي عبارة عن حاجتين (قلبك+ جوارحك ايلي هي الحواس وكده)التوكل ايلي ربنا عايزه بقى:

ان جوارحك تكون شغاله بتسعى بتجري ورا الاسباب ايلي هتحققلك ايلي انتي عيزاه انما قلبك عكس كده عارف ومتاكد ان ربنا ايلي بايده كل حاجه
معادله صعبه اوي يانسمة
لا هقولك حاجه تثبتلك انها سهله جداااااااااااااااااا
بصي بقى
انتي اهو دلوقتي عايزة تنجحي مثلا دا كده هدفك تمام تفتكري بقى تقعدي حاطه ايدك على خدك وتقولي اه ماهو ربنا بقى لو عايزني انجح هنجح انا هتعب نفسي ليه
لا كده مش توكل
التوكل الصح بقى انك تذاكري وتموتي نفسك مذاكرة زي ما بيقولوا بس من جواكي متاكده ان ربنا هو ايلي يقدر ينجحك وبايده كل حاجه انتي ماعليكي غير انك بتسعي عشان ربنا يقف جنبك بجد لما يشفو انك بتتعبي
او
انتي مثلا عايزة تجيبي اطفال او ابنك عيان بتعملي ايه؟

لازم تروحي لاحسن دكاترة في ناس بتسافر لدكاترة وبتقطع مسافه كبييييييرة عشان يروحوا لدكتور فلان ويقطعوا تذكرة ويستنوا الحجز بالساعات صابرين انتي كده صح متقعديش حاطه ايدك على خدك وتقولي دا قدر ونصيب لا اسعي اومال فين التوكل دا يانسمة؟ التوكل هيبقى في قلبك يعني بتسعي وبتتعبي وبتاخدي بالاسباب بس من جواكي مسلمه امرك لربنا وواثقه انه مش هيخيب رجائك
دا التوكل الصح
ميبقاش بلسانك لأ.. بقلبببببببك ..برضاكي عن ربنا ف اي حاجه يعملهالك ..معقول عندك شك ان ربنا هيديكي او يعنل فيكي حاجه وحشه؟؟؟ ازااااااااي دا ربنا بيقول (ومن يتوكل على الله فهو حسبه) عارفه يعني ايه حسبه ؟؟
يعني ربنا هيكفيكي باللي انتي عيزاه وهيبقى مسؤل عنك ومش هيحوجك لناس فقرا زيهم زيك عند ربنا بس انتي اجتهدي اعملي ايلي عليكي وخليكي وااااااااااااااثقه ان ربنا مش هيسيبك ياااااااااااه لو تعرفي تبقى كده

بصي انا قريت جمله رووووعه في كتاب قبل كده
العلماء بيقولوا ايه ينقطع امل الناس اذا انقطعت الاسباب....ويزيد امل المؤمن كلما انقطعت الاسباب) ايه الكلام الكبير المعقد دا يانسمة؟
بصي ببساطه
يعني مثلا تخيلي ان في واحد مهم كان وعدك انه هيشغلك اول ما تتخرجي والواحد دا استقال هتعملي ايه؟ او حد انتي بتحبيه اووووووووووووي وشيفاه كل املك في دنيتك وضاع منك هتعملي ايه؟؟

هقولك انا
لو انتي انسانه عاديه (مش متوكله ولا تعرفي يعني ايه الثقه بالله) هتتعبي اووووووي وهتعيطي وتقولي خلاص مفيش امل اشتغل انا حظي وحش انا انا انا (ينقطع امل الناس اذا انقطعت الاسباب)

اما بقى لو انتي فعلا مؤمنة بالله بجد بقلبك مش كلام نظري وخلاص هتقولي الحمد لله خلااااااااص مفيش حاجه بايدي اعملها يارب انت طلبت مني اسعي وسعيت وفشلت انا كده مش بايدي حاجه هرمي حملي كللللللللله عليك يارب تتصرفلي انت بقى وانا مش هعمل حاجه غير اني ادعيك بثقه وافوض امري كله ليك

خدي بالللللللللللللك
حاجه مهمه اوي بتحصلنا كللللللللللللنا ديما احيانا من كتر حب ربنا فيكي بيقطع عنك كللللل سبب وكل حاجه شغلاكي عنه

زي مثلا انه يخلي ايلي هيشغلك يستقيل او يخلي اكتر حد انتي مهتمه بيه وبتحبيه يموووووووت وانتي يعيني تحسي الدنيا اسودت مع انك لو فكرتي في ربنا هتلاقيه عمل كده عشان عايزك ترجعيله تاني بيدايقك قصد ويخليكي تقعي ف مشكله قااااااااصد بياخد منك الحاجه ايلي اتعلقتي بيها زي ما اخد سيدنا يوسف من سيدنا يعقوب 20 سنه

عشان تجري عليه وتقولي يااااااااارب الحقني انا جيتلك اهو سامحني على تقصيري متستغربيش ...ربنا بيغيييييييييييير اوووووووووي على قلبك

يااااااااه تخيلي بيحبك اد ايه دانا اعرف نااااس للاسف بيبعدوا عن ربنا اكتر في المصايب!!! من كتر تشاؤمهم واستسلامهم وحزنهم بييأسوا استغفر الله ازااااااااي متوكله على ربنا ومسلمه امرك كللللللللله لله وتخافي او تدايقي...ازاااي ازاي تعملي في نفسك كده انتي مش حاسه ان ضيقتك وحزنك دا معناه تشاؤم؟ ومش عارفه انك لو فعلا متوكله مينفعش تتشائمي!!!

هقولك اعظم قصة عرفتها عن التوكل بالله
سيدنا ابراهيم..لما الكفار قالوا انهم هيحدفوه في النار اعدوا بالاسبوووع يبنوا حاجه ضخمه كده عشان يولعوا فيها النار ويحدفوا فيها وكل البلد تشهد
كانت نار مرعبه رهييييبة لدرجه ان الطيور ايلي كانت تطير فوقها مثلا كانت تتحرق من لهيبها بس
فلما جه اليوم ايلي هيتحدف فيه بقى ..الكفار مكانوش عارفين يحدفوا ازاي ماهو ايلي هيحدفه هيتحرق معاه فقالوا احنا نحطه على حاجه اسمها منجنيق كده نربطه فيها ويطير عليها يقعع في النار
وفعلا دا حصل وخلاص في اخر لحظات سيدنا ابراهيم كان خلاص هيتحدف في النار
جائه سيدنا جبريل بيساله عايز حاجه يا ابراهيم؟
تخيلي سيدنا ابراهيم يقوله ايه : اما لك فلا ..واما لربي فنعم ..حسبي الله ونعم الوكيل( يعني بيقوله مش عايز منك انتي يا جبريل انا بشكي لربنا
واعد يقول حسبي الله هو نعم الوكيييييييييييييل ويكرر فيها بس بقلبه مش لسانه وخلاص
ولما اتحدف في النار ربنا امر النار(قلنا يانار كوني بردا وسلاما على ابراهيم )

تخيلي/ شايفه ربنا وقدرته شوفتي ان ايلي بيتوكل على الله بجد مستحيل يضيعه مستحييييييييييييييييييييييل اقسم بالله العظيم

طيب يانسمة اعمل ايه عشان ابقى متوكله على الله؟
1/ دوام التعلق بالله( داومي على الذكر والدعاء ادعي كتير ودربي نفسك على احساس التوكل لانه مش هييجي فجاه لازم تدريج)
2/- الاختبار: أحياناً يغلق الله عليك أسباب الدنيا التي تعتمد عليها حتىيرى هل تضع كل آمالك في الوكيل أم لا.. ففلان يستقيل، والآخر يتوفى. النبيصلى الله عليه وسلم في أصعب فترات الدعوة يتوفى عمه أبو طالب الذي كانبمثابة السند والحماية، وتتوفى زوجته السيدة خديجة التي كانت مصدر الحنانوالرعاية.. لماذا؟! حتى يقول له الله سبحانه.. من لك غيري يدافع عنك؟

3/ديما افتكري قصه سيدنا ابراهيم ايلي قولتهالك
4/متخافيش من المستقبل او خافي بس مش لدرجه انك تبقى مهمومه من ايلي هيحصل قبل ما يحصل لان ايلي عرف التوكل على الله مستحيل يخاف

5/ديما قولي لما تصحي و قبل ما تنامي وقبل ما تخرجي من بيتك:حسبي الله لا اله الا هو عليه توكلت وهو رب العرش العظيم

ومش هكرر لازم تحسيها بقلبك والدعاء دا معناه انك بتقولي يارب انت مسؤل عني وانا فوضت امري كله ليك ومتاكده انك مش هتعملي غير الخير والصح لاني معرفش حاجه
6/ خلي الحديث دا ديما قدامك انقليه عندك واحفظيه او خليه ديما قدام عينك:
احفظ الله يحفظك، احفـظ الله تجده تجاهك، إذا سألت فاسأل الله، وإذا استعنت فاستعن بالله، واعلم أن الأمة لو اجتمعت على أن ينفعوك بشيء لـم ينفعـوك إلا بشيء قـد كتبـه الله لك، وإن اجتمعوا على أن يضرّوك بشيء لم يضرّوك إلابشيء قد كتبه الله عليك، رفعت الأقلام وجفّت الصحف(
اااااااااه يانسمة فكرتيني دا الحديث دا كنت حفظاه وخدته في المدرسة
اه مانا عارفه بس عارفه انك مش فهماه برده للاسف
احفظ الله يحفظك= خلي ربنا جوا قلبك حافظي على ذكره ووجوده جواكي هتلاقيه يحافظ عليكي طول حياتك ومماتك كمان

بصي بقى المعنى دا: تخيلي كده لو مصر كلها او كل البلاد اتفقوا انهم هيساعدوكي في تحقيق هدفك او قالولك شوفي انتي عايزة هنعمله متخيله ...محدش هيقدر ينفعك بحاجه ولا يساعدك منهم الا لو ربنا اصلا كاتبلك الحاجه دي والله ما هيعرفوا مهما عملوا

وبرده لو كل البلد اتفقت انهم يضروكي ف حاجه وكل البلد متجمعه تحت بيتك عشان يموتوكي او يعملوا فيكي حاجه وحشه برده مستحييييييييييييييل يقدروا يعملوا اي حاجه الا اصلا لو ربنا كاتب عنده انك هتموتي في الوقت دا او حاجه هتأذيكي
يعني لو حاجه ضرتك في حياتك فدي اصلا مكتوبه عليكي كانت هتحصل هتحصل

متقعديش تقولي يارتني ما كنت عملت كذا او يارتني عملت كذا
متكلفيش نفسك فوق طاقتك
خلي ربنا ديما ف قلبك
خليكي متوكله عليه بجدفوضي امرك لله هو العالم بيكي هو الوحيد ايلي يقدر يسعدك ويبعد عنك اي هم ويحققلك كل ايلي تتمنيهبس في نفس الوقت لازم تعملي ايلي عليكي

وفي كلمة غلط ديما نقولها
احنا بنقول انا توكلت على الله وعليكي...الجمله دي غلط وحراااااااااام اوووووووووي
الصح انك تقولي مثلا انا توكلت على الله (ثم) عليكي

انا كده خلصت بس قبل ما تمشوا عايزة اقولكم على صندوق الرسايل بتاعكم ياريت كل بنوته تاخد بالها منه وتشوفوا لو مليان تحذف منه وتعمل شيك عليه اول باول
طبعا الواجب حاجه بينك وبين ربنا ونفسك المرادي اتدربي على التوكل بالمعنى ايلي اتكلمنا فيه
واي استفسار او ملحوظه او معلومه اضافيه انا تحت امرك

ياحي ياقيوم برحمتك استغيث اصلح لي شأني كله ولا تكلني الى نفسي طرفه عين ولا حول ولا قوة الا بالله العلي العظيم
المحاضرة الجايه:الغيبة والنميمة