اولا : الموضوع ده مهم جدا حبيت اضيفه علشان كل الشباب يقراه المشكلة اللى حبيت اعرضها لكم هى مشكلة بروفيل الفيس بوك او اي بروفايل علي اي موقع ..
سؤال تحول إلى جروب جديد طرح قضية فلسفية بطريقة تأملية لخص فيها فلسفة الحياة وما يقدمه الإنسان من أعمال في حياته مشبها إياه بالصفحة الخاصة به على الفيس بوك والتي تشبه إلى حد كبير الحياة طارحة تساؤل حول مصير تلك الصفحة بعد وفاة مصممها ..
يضم الجروب في عضويته 19 ألف مستخدم إنشاؤه محمود مصطفى كمال ،
سرد في صفحة الجروب الرئيسية أسباب تصميمه له قائلاً :الملائكة يكتبوا أعمالنا في الدنيا .. يكتبوا " صحيفة الأعمال " لكل واحد ، يعني كل واحد له ملف ( file ) فوق كدة فيه كل حاجة بيعملها عشان يتحاسب عليها في الآخرة ، طب الواحد يعمل إيه لو صحيفة أعماله إتنشرت قدام كل الناس اللي يعرفها ، وفي الدنيا ، تخيل إنك مت .. وكتاب أعمالك خلاص .. أكتمل .. وتم نشره ! شئ مرعب مش كده ؟ و لكنك واعي له تماماَ ، بل إنك آنت اللي بتنشر الكتاب بنفسك قبل ما تموت ، البروفايل بتاعك على فيس بوك .. مبيموتش .
وكشف مصمم الجروب المواقف التي دفعته إلى التفكير في هذه الفكرة قائلاً :
" الموضوع إن فيه اتنين أعرفهم توفوا في حادثين متفرقين ، والإتنين كنت أعرفهم معرفة سطحية ولكن عندي على فيس بوك ، الأول توفى في حادث سيارة وعرفت من صديق لي ، ولما روحت البيت فتحت فيس بوك لقيت واحد صاحبنا عامله بطاقة ( tag ) في ملاحظة ( note ) فيها أدعية له .. ولكن المشكلة ، إن المتوفي كان كغيره من الشباب ، بيفتخر بحاجات كتير غلط بيعملها ، وأخر صورة الملف الشخصي ( profile picture ) كان حاططها ، صورة له وهو ماسك كانز بيرة .. والموضوع كان محرج وغريب ..
أدعية ودعوات وصورة له ماسك بيرة .. لا يستطيع تغييرها سواه هو .. وهو مات !
مكنش يعرف إن الصورة دي هيبقي الـ تعليقات ( comments ) اللي عليها :
" الله يرحمك ويغفر لك " و " اللهم أغفر له خطاياه " و " اللهم أحسن خاتمتنا " ..
وبروفايل الفيس بوك بتاعه كان سبب اكتئاب لأخته تحديداً واللي أنقذت الموقف بإنها دخلت عالمسنجر بتاعه من اللاب توب الخاص بيه واللي معمول فيه الماسنجر تسجيل الدخول آلي ( auto sign in ) وقفلت من خلاله بروفايل الفيس بوك خالص .
الشخص التاني مكنتش أعرفه خالص ولكنه كان مشترك في جروب لمحبي السيارات ، كان عنده 18 أو 19سنة ، و كأن بيسأل أسألة تبين إنه بيحب السرعة ، .. دخلت عالبروفايل بتاعه أكتبله إيه الأخبار .. لقيت علي الـ حائط ( wall ) حاجات زي " هتوحشنا " و " الله يرحمك " و " يا رب إجعل مثواه الجنة "
وموعد عزاء .. عرفت إنه مات ..، فضولي لم يمنعني من تصفح البروفايل بتاعته .. لقيت النشاط الاخير ( the last activity ) واللي هي كانت المفروض عملها يوم وفاته ، كان مسابقة ( quiz ) بعنوان : كم من شركاء *** لديك قبل أن تموت ؟
( how many *** partners will you have before you die ؟ )
الحقيقة مقدرتش أفكر في أي أفكار أو يمكن الأفكار في دماغي كانت كتير فمقدرتش أركز في ولا واحدة فيهم ، هل الواحد ممكن ياخد مسابقة ( quiz ) على سبيل الهزار أخره جملة قبل ان تموت ( before you die ) ، وهو ميعرفش إن ( before you die ) دي فترة قصيرة جداًَ لا تتعدى الساعات ! و ياخد الـ مسابقة ( Quiz ) ويموت وينزل تحت الأرض وإحنا قاعدين قدام شاشة الكمبيوتر بنتفرج على إن دي كانت آخر نشاط له ( his last activity ) .
و زي صورة كانز البيرة .. دي و كل الحاجات اللي عالبروفايل بتاعه .. غير قابلة للمحو .. لأن الوحيد اللي يقدر يغير .. مات .. والبروفايل تحول إلي مزار لأشياء تحولت إلى تاريخ !
الحقيقة زيارة بروفايل على فيس بوك لشخص إنت عارف إنه مات شئ غريب جداً وإحساس غريب ، بتحس إنك بتكلم شبح .. بتلاقي كلام هو كاتبه في ملاحظات ( notes ) أو تعليقات ( comments ) عالصور .. تحس إنها مينفعش تكون موجودة لأنه ميت !
بتلاقي قائمة أصدقاء .. لا يمكن في يوم من الأيام هيزيدوا واحد .. وهتلاقي صور .. مش هيكون لها جديد .
الإنترنت وفيس بوك تحديداَ .. خلا الواحد ممكن يعرض حياته كلها قدام الناس .. ويسيبها ويموت .. وتفضل هي .. زي بالضبط أكن صحيفة أعمالك أتطبعت وبقت تتباع عند بتاع الجرايد .. ممكن تدخل على بروفايل حد مات وأنت مكنتش تعرفه أصلاَ ..
وتعرف كان بيحب مزيكا إيه وأفلام إيه وبيشجع أنهي فريق
وكان مرتبط بأنهي بنت وليه كانوا متخانقين قبل ما يموت
ومين صحابه وحالته النفسية كانت عاملة إزاي وشخصيته كان شكلها إيه
وكان شكله إيه يوم ما مات في الصور اللي إتاخدت بالصدفة من غير ما يعرفوا اللي لسه هيحصل ،
وكمان تعرف إيه أخر حاجة كان بيفكر فيها قبل ما يموت .. قاعد تقلب في حياة واحد راقد على ظهره في مكان مظلم وعاري من كل شئ في الدنيا عدا قماشة بيضاء ملفوف فيها !
بل وتعرف معلومة زيادة هو نفسه مكنش يعرفها .. إنه كان هيموت بعد ما يعمل الحاجات دي مباشرة ! ومكنش هيبقي فيه أي طريقة لتغييرها .. وهتفضل قدام الكل بعد ما كتبها بمزاجه .
ويتساءل مصمم الجروب قائلاً : " هل الإنترنت ممكن يتحول لمقبرة أكبر من الهرم الأكبر وأقوى من النقوش الفرعونية على جدرأنه لأنه ببساطة .. لا هيتمسح ولا هيتغير إلا من خلال اللي كتبه .. هل حد فينا يتخيل إن البروفايل بتاعه ممكن يتحول لـ " نصب تذكاري " !
رد فعلك ممكن يكون إيه لو تقدر تقدم الوقت وتشوف صفحة بروفايلك بتاعة بكرة ولقيت مكتوب فيها الله يرحمك وهتوحشنا وهندعيلك في كل صلاة .. وصورتك هي صورة جروب عنوانه مات ( rest in peace ) !
الرئيسية
اليومية
