علاج مشكلة السواد حول الفم

السلام عليكم ورحمة الله




علاج مشكلة السواد حول الفم








مشكلة النهاردة الي حابة اتكلم عنها هي مشكلة محرجة جدا وبتعاني
منها بنات ونساء كتير
الا هي ومشكلة السواد حول الفم

والاسباب لها متعددة اما انها صحية يعني داخلية
كان من ضمنها لما واجهتني المشكلة ديه وسالت اهل التخصص والطب
قيل لي ارتفاع الاملاح في البول او نسبة الكوليسترول في الدم وفي بعض الاحيان نقص بعض الفيتامينات في الجسم او مشاكل في القولون والجهاز الهضمي.

ومن الاسباب الخارجية اللي بتسبب كده
هي طبعا معجون الاسنان واننا نسيبه يسيل خارج الفم وفي منطقة جوانب الفم بالذات
وكمان اكل بعض الفواكه والموالح منها خاصة و اننا نسيبها تنزل عصارتها حوالين الفم
واكيد طبعا استعمال انواع روج وتحديد رخيصة ومجهولة المصدر من اللي ب 2.5 مثلا و ديه من الحاجات الخطيرة جدا لانها بتغمق لون الشفايف وكمان لما بتيجي تمسحي الروج ده بيسيب اثار خارج الفم ويبهدلها ويسبب السواد ده



الحل بامر الله رب العالمين هيتكون من تلات خطوات:

الخطوة الاولي
هي
الوقاية
يعني تاخدي بالك من المسببات الطبية اللي قلنا عليها وكمان تعملي تحاليل كاملة وتعرضيها علي الاخصائين وتشوفي العلاج المناسب لك ده اذا كان السبب عضوي ولما السبب العضوي
يروح اكيد بامر الله وبالثقة في الله السواد ده هيروح هو كمان.




الخطوة التانية
العلاج
وده علي خطوتين:

خطوة العلاج الاولي:
هي الانتظام علي ماسكين اتنين فقط هتعمليهم بالتبادل اسبوعيا
يعني في الاسبوع مرتين ماسكات مرة من الماسك الاول ومرة من الماسك التاني.

الماسك الاول
عبارة عن عسل النحل الصافي مضاف له شوية زبادي وتدهني بيه المنطقة من تحت الفم لحد
الدقن ولما ينشف تشطفيه كويس جدا بالميه بس من غير صابون عطري او اي شيء.

الماسك التاني:
عبارة عن النشا العادي بتاع المطبخ ده مضاف اليه ميه ورد(هي المفضلة طبعا وكل ماكانت طبيعية كل ماكانت النتيجة افضل)
او ميه عادية ولكن مغلية وتسيبها تبرد وتخلطيهم كويس جدا لحد ما يبقوا عجينة متماسكة وبنفس الطريقة افرديه ولما ينشف قشريه من علي المنطقة واشطفي بالميه بس.

خطوة العلاج التانية:
استعمال كريم طبي للض
ومن التجربة الشخصية بمنتهي الامانة
كريم مون ليت Moon Light Cream
وان ما لقيتش الاول تقدري تستعملي ده لانه نفس التركيب تقريبا
Moon Face Cream
بتشتريه من اي صيدليه وسعره بين 38 او 40 جنيه تقريبا والعبوة بتكفي تقريبا تلات شهور
وبتستعمليه مرتين في اليوم وانتي في البيت ما تخرجيش بيه بره ومع المواظبة بامر الله في خلال اسبوع عشر ايام بالكتير بتشوفي تاثير.
وهو طبيعي جدا مالوش اي اضرار ان شاء الله بستعمله وانا حامل وتحت استشارة الطبيب




الخطوة التالتة والاخيرة:

وفيها لازم ناخد بالنا من حاجات كتيرة قوي منها:

1- لما تخرجي في الشمس استعملي واقي شمس بدرجة مناسبة وادهنية في المنطقة
ديه عشان ما تسمرش تاني او يتغير لونها مع التعرض للشمس.
وممكن كمان تستعملي زبدة كاكاو للشفاي بمعامل حماية من الشمس عشان الشفايف لونها ما يتغيرش هي كمان
(من شركة لابيلو علي سبيل المثال)
2- ممنوع استعمال بعض الوصفات العجيبة اللي بشوفها زي الفازلين والفكس
والا الفازلين والكركم
لان الفازلين ده من الاسباب اللي بتسمر المكان عند بعض الناس
وكمان الليمون ممنوع يستعمل
و الكريمات المعطرة بوجه عام ممنوعة تستعملي هي كمان خاصة لو خارجة بره وهتعرضي برضه لشمس زي ما قلت فوق.

3- بلاش مستحضرات التجميل الرخيصة ومجهولة المصدر لانها بجد ضرها اكبر بكتير قوي
من نفعها ده ان وجد لها نفع اصلا
و حاجة غالية ابرك من عشرة رخيصة



انا كده خلصت بامر الله النهاردة واتمني اني ما طولتش عليكم
وقدرت افيدكم باللي قدرت عليه