ممكن اسالك سؤال؟

ممكن اسالك سؤال؟
لما بتصحي من النوم وانتي لسه ع السرير مشاعرك بتكون ايه؟؟
يعني مخنوقه وزهئانه او متشائمه او مش فارق معاكي انك بتبدئي يوم جديد ولا متفائله ومروئة على الاخر؟
طيب لما تيجي تنامي بليل بقى ...بتنامي علطول اول راسك تيجي ع المخده؟ ولا بتقعدي كتييييييير على ماتنامي وبيكون نومك كله قلق
من الاخر.. انتي راضية عن حياتك ؟؟ ولا حزينه؟؟

بصو يا بنات انا مش هقول كلام نظري
حياة كل بنوته مننا مليانه مشاكل وكل واحده فينا فيها ايلي مكفيها واكيد مننا بنوته مجروحه اوووي ومننا برده واحدة مهمومه وعندها بلاوي..ابنك مريض مثلا؟ ..عايزة تنجحي واتخنقتي من المذاكرة مثلا ..فقدتي انسان عزيز عليكي مثلا ..نفسك تتخطبي تتجوزي تجيبي اطفال تشتغلي..زهئتي ومليتي من كلام الناس..زهئتي واتخنقتي بسبب انك كل ما تيجي تقربي من ربنا ترجعي تاني ..في ذنب معين بتعمليه ومش قادرة توقفيه
كل الحاجات دي مخلية كل بنوته مننا حزييييينه ومهمومه وقرفانه ومخنوقه وحاسه بوجععع

انا معنديش حل لكل دا ..متستنيش مني الاقي حل لكده لاني عاجزه ومش انا بس ايلي عاجزه لا اي انسان مخلوق يعني بشري عاجز يلاقيلك حل لمشاكلك للاسف
انا هحاول اديكي مفتااااااااااااح تمسكيه بايدك وتحلي بيه كل مشاكلك باذن الله
فارجوووووووكي اوعي تضيعي المفتاح دا امانه ف رقبتك

الصبــــــر
اه هو دا المفتاح لحل كل المشاكل
والصبر كلام عملي على فكرة مش نظري وهثبتلك دا
كل حاجه حواليكي اصلا اساسها الصبر.. ربنا خلق الكون ف 6 ايام ليه؟؟ تفتكروا ربنا عاجز يخلقه ف لحظه وسبحانه بيقول للشئ كن فيكون ..ليه خلقه ف 6 ايام
عشان يعلمك الصبر

انواع الصبر:
ايه يانسمة في انواع للصبر كمان؟؟ اه تخيلي في 3 انواع لازم تكملي التلاته عشان يبقى اسمك من الصابرين
1/ الصبر عن المعاصي
2/ صبر على الطاعات (دي اقوى انواع الصبر عند ربنا)
3/ صبر على المصائب والابتلاءات
بصي ياست الكل
الصبر على المعاصي يعني انتي مثلا مدمنه غيبة ونميمه .. الصبر هنا بقى انك تمسكي لسانك وتصبري عليه لحد ما يتعود يبطل العاده دي
او مثلا باباكي ومامتك بيدايقوكي ..الصبر هنا بقى برده انك تسمعي كلامهم لان ربنا امرك بكده ومش تدايقي ولا تقولي اوف

صبر على الطاعات ودي اقوى انواع الصبر زي ما قولتلكم
يعني ايه الكلام دا
يعني انتي دلوقتي الحمد لله بقيتي تصلي كل الفروض اهو وعلى وقتها وبتصلي الفجر كمان او قيام ليل او اي عباده جميله انتي بقيتي تعمليها..وجيتي حسيتي بملل وزهأ منها ..لا مينفعش انتي كده مش صبورة..لازم تصبري على الطاعات ومتمليش منها ولا تكسلي ودا اقوىىىىىىىىىى انواااااع الصبر عند ربنا يعني ربنا بيحبك اووووووي لما تستمري في طاعتك
وبعدين تعالي هنا انتي بتقدري تصبري تتفرجي على فيلم ولا مسلسل بالساعات متتحركيش وتيجي عند الصلاة ايلي مش هتاخد 5 دقايق وتكسلي!!!!!
الصبر على المصايب بقى
يعني زي مصيبة الموت دي اقوى مصيبة على فكرة
وزي مصيبة المرض او انك تصبري على اذى الناس او انك تصبري على فشلك او على زوجك ايلي مدايقك



طيب استني استني تعالي شوفي اهمية انك تصبري وثوابها عند ربنا عامل ازاي تعالي افتح نفسك:
الصبر دا من مكارم الاخلاق ومفيش خلق احب الى الله من الصبر
1/تخيلي ربنا يذكرها في القرءان اكتر من 90 مرة !!!!
مفيش اخلاق اتذكرت اده انتي متخيله ربنا يقصد يقول من كده انه حاجه مهمه جدااااااااا عند ربنا
2/بصي ربنا حبيبك بيقولك ايه: والله يحب الصابرين........... يعني لو صبرتي على كل ايلي قولتهولك دا هتوصلي ان ربنا يحببببك عارفه يعني ايه ربنا يحبك ولا مش عارفه
3/ ( والله مع الصابرين) يعني لو صبرتي برده ربنا هيبقى معاكي ...معاكي يعني بيحرصك ..جنبك.. من الاخر هتبقى في ذمة الله
4/(وبشر الصابرين) تخيلي لما ربنا يندهلك ويقولك يا فلانه انا ببشرك وفرحان بيكي لاني اختبرتك بمصيبة وانتي صبرتي
5/ ( انما يوفي الصابرون اجرهم بغير حساب)
يااااااااااه
الصبر دا الحاجه الوحيده ايلي ربنا مقالش ثوابه ايه من كتر ماهو كتييييير بقى من غير حسااااااب
ربنا هيندهلك ويقولك يوم القيامه يافلانه انتي صبرتي ومقولتيش ليه يارب عملت فيا كده زي ما كله بيقول محاسبتيش ربك..فعلشان كده مش هحاسبك انهارده وهتدخلي الجنه من غير حساب
ياااااااااااه
6/ حديث الرسول عليه الصلاة والسلام:
( مايصيب المسلم من نصب ولا وصب ولا هم ولا حزن ولا اذى ولا غم حتى اشوكه يشاكها الا كفر الله بها من خطاياه)
بصي ..نصب يعني تعب عموما
وصب يعني مرض
يعني بمعنى اصح الرسول حبيبك بيقولك انك مفيش حاجه هتصيبك ف الدنيا دي سواء تعب عام حتى لو كنتي بتلعبي وتعبتي تخيلي!! ولا من مرض ولا هم ولا حزن ولا اذى من الناس ولا غم وحتى لو شكه دبوس شكيتك
كللللللللللل دا ربنا بيحتسبها عنده وبيكفر ذنوبك بيها
زعلانه ليه بقى ؟؟

بصراحه يا نسمة انا مش عارفه اصلا ليه ربنا بيعمل فيا كده كل شويا الاقي مصيبة نازله على نفوخي ومش لاحقه افوء ولا عارفه اثبت حتى طاعتي ولا عارفه اعمل اي حاجه ومخنوقه حاسه ربنا مش راضي عني كده.. صح؟
لا غلط غلط غلط غلط
بصي اقري كده الحديث دا وشوفي الرسول عليه الصلاة والسلام بيرد عليكي:
("أشد الناس بلاءً الأنبياء ثم الأمثل فالأمثل يبتلى الرجل على قدر دينه فإن كان في دينه صلابة اشتدبلاؤه وإن كان في دينه رقة ابتلي على قدر دينه فما يبرح البلاء بالعبد حتى يتركه يمشي على الأرض وما عليه خطيئة)
اقري كويس تااااني وتالت الكلام مهم جدااااااااا
معنى الحديث خطير ومهم وغايب عن بالك
يعني ربنا يبتلي الناس على حسب ايمانهم
يعني كل ما ايمانك هيبقى قوي ربنا هيبتليكي اكتر
ليه يانسمة...ليه لما ايماني بيقوي ربنا يبتليني اكتر؟
علشان بيحبك
عايز يساعدك في تخفيف ذنوبك
عايزك لما تقابليه يوم القيامه تبقى نضيييييفه من ذنوبك من كتر ماهو بيحبك.. تخيلي!! سبحان الله
وعلشان لو حياتك مستقرة وبتلاقي كل حاجه تتمنيها ومفيش حاجه مديقاكي ومعكننه عليكي حياتك خلاص فانتي كده هتحتاجي لربنا ف ايه بقى مانتي عندك كل حاجه ..هتحسي بغرور ..وهتنسي ربنا اصلا.. فلازم ربنا يدايقك ف حياتك عشان تفتكريه وتجري عليه تقولي يارب الحقني وهو يفرح بيكي
وعلشان عمرك ما هتشتاقي للجنه الا لما تحسي بمرارة الدنيا
وعلشان عمرك ما هتفرحي الا لو حسيتي بطعم الذل والصبر لحد ما تنولي ايلي تتمنيه..وقتها هتحسي بقيمته اووووي


ايوة يانسمة جميل الكلام دا بس اعمل ايه انا مش قادرة استحمل دا فوق طاقتي بجد
لا ياستي
متهيالك
لان ربنا بيقول لا يكلف الله نفسا الا وسعها يعني ربنا بيبتليكي بمصيبة مرضك او مرض ابنك او موت انسان عزيز عليكي او فشل في الحياه او ايييي حاجه ..بيبتليكي وهو عارف ومتاكد وواثق انك هتقدري تتحمليها والا مكانش ابتلاكي بيها لانه بيخاف عليكي
انتي ليه مش قادره تقتنعي ان ربنا احن عليكي من مامتك
شايفه عاطفه الامومه اقوى العواطف شايفه امك بتحبك ازاي وبتخاف عليكي من الهوا الطاير ولو حد قرب منك يلهوووي بتبقى عايزة تاكله
تخيلي ربنا احن علي عبده من امه وبيخاف عليكي اكتر ما مامتك بتخاف عليكي
يااااااااااااه
طب معقول تتخيلي ان مامتك ممكن تفكر لحظه واحده تأذيكي؟؟
يبقى ازااااااااااي تدايقي من ربنا وتفتكري انه بيأذيكي بالمصيبة اقسم بالله العظيم ربنا مستحيييييييييييل يديكي حاجه وحشه

نسمة ... انتي عايزة تفهميني ان مرضي دا حاجه حلوة؟؟ او اني انجرح من انسان بحبه اووووي دي حاجه حلوة؟؟ او ان امي او ابويا او اخويا او ابني او او يموتوا دي حلوة؟؟
دي كلها مرارة
ايوة مراره مقولتش حاجه والله يكون بعونك
بس دا حاجه فيها مصلحه ليكي
انتي مش شيفاها دلوقتي اصبري هتشوفيها كمان شويا
دا ربنا بيقولك وعسى ان تكرهوا شيئا وهو خير لكم
يعني ممكن تكوني كارهه وضعك وحياتك ومصيبتك ومرضك وانتي مش فاهمه ان دا هو الخير ليكي
طالما انتي مش فاهمه معلش متتكلميش بقى ولا تعترضي غير لما تفهمي الاول ووقتها اتكلمي ياستي براحتك

بصي بصي اقري الكلام دا وشوفي رحمة ربنا بيكي وهو بيحبك اد ايه
( ما من يوم الا ويستأذن البحر ربه : يارب أأذن لي ان اغرق ابن ادم فانه اكل رزقك وعبد غيرك..وتقول الجبال: يارب أأذن لي ان اطبق على ابن ادم فانه اكل رزقك وعبد غيرك..وتقول الارض : يارب أأذن لي ان ابتلع ابن ادم فانه اكل رزقك وعبد غيرك (يلهوي محدش طايقنا)
فيقول الله: دعوهم لو خلقتموهم لرحمتموهم
ياااااااااااه
يعني كل يوم الارض والجبال والبحار تنادي وتستأذن ربنا انها تقضي علينا عشان احنا ملهيين عن ربنا ومش عاجبنا العجب ومع ذلك ربنا كل يوم كل يوم يقولهم لا انا عايز ارحمهم لاني بحبهم حتى لو محدش عبدني برده هنده عليهم وهصبرررررررر

شروووووط الصبر:
نعم يا نسمة هو كمان الصبر له شروط ان شاء الله
ااااااااه
شرطيييييييييييين
1/ انك مثلا اهو لا قدر الله عرفتي حاجه دايقتك اووووي وشيفاها مشكله او مصيبة
اول لحظة ما عرفتي عملتي ايه؟
حاجه من الاتنين هتعمليهم ...اما انك تقولي يلهوي يادي المصيبة هو انا ناقصه ليه كده يارب ايه الهم دا وطبعا دا غللللللللللط حتى لو رجعتي تتماسكي بعدها وتصبري لا مش هتاخدي ثوابك كامل لان اصعب لحظه واقوى لحظه ايلي لازم تتماسكي فيها هي اللحظه الاولى
او انك هتعملي الصح وتقول لا حول ولا قوة الا بالله اللهم اجرني في مصيبتي واخلفني خيرا منها
لو قولتي الجمله دي كده بالضببببببط اقسملك ربنا هيعوضك هيعوضك خير اووووووووووي وقريب جداااااااا وهيخليكي تقولي الحمد لله انه وقعني في المصيبة دي لولا اني وقعت فيها مكنتش هشوف الخير والسعاده دول كلهم

2/ تاني شرط
انك تصبري اه بس تصبري الصبر الجميل ايلي ربنا عايزه وبيحبه اووووي
يعني ايه يانسمة؟
بصي يا قمر خلينا واقعيين شويا
انا عارفه ان كل بنوته مننا عندها مشكله ف حياتها او بتتفاجئ بمصيبة نازله عليها مرة واحده يعني ايلي ابنها مريض او هي مريضه او فقدت باباها مامتها او حتى حبيبها او فشلت في دراستها مثلا او مش عارفه تذاكر او مش عارفه تصلي
اكيييييييييييد كللللللللللنا مرينا ولو بحاجه من الحاجات دي
هتتألمي اووووووووي وتتوجعي وتحسي انك انكسرتي وقلبك مجرووووووووح وعينك بتعيط وهاين عليكي تعيطي دم كمان .. انا عارفه والله كل دا ومش هناقشك فيه لانه حقك تتالمي لانك انسانه
انما خليكي من جواكي قلبك بيتقطع اه بس صااااابر واااثق ان ربنا مش هيسيبك كده
حاسس بأمل في ربنا
حااسس ان ربنا هيعوضه
اقسملك ربنا حنين اوووووي مستحيل تهوني عليه افهمي كده هتلاقي نفسك صبرتي
خليكي من جواكي راضية عن ربنا متزعليش منه دا بيحبك وهو ايلي عارف مصلحتك مش انتي
سيبيها عليه ومش هيخيب ظنك ابدا فيييه

يابنات انا الفترة ايلي فاتت كنت بمر بظروف صعبه اوووووووووووي وكلها ابتلاءات من عند ربنا
يعني في الاول اسمع ان ابن خالي وهو طفل لسه مريض مرض هيخليه يعمل جلسات كهربا ربنا يعافيه
وبعد شويا عملت حادثه وشوفت الموت بعيني ومريت لحظات قاسيه جدااااااااااااا
وبعدها حصل مشكله مع خطيبي مشكله جامده جدااااااااااا من الاخر ملهاش حل وربنا عالم انا قلبي متعلق بيه ازاااااي بعد ربنا سبحانه وتعالى
ربنا خده مني امبارح بليل الساعه 7 تحديدا والله العظيم لان المشكله كبرت اوووووي اكتر ماهي كبيرة وبقيت احس انها بتأذي مشاعري فقررنا نسيب بعض خلاص وكنت فاكرة انها حاجه سهله اني اسيبه وابدا حياتي من الاول
جريت على ربنا وحسيت ان قلبي في سكينه ومجروح اوووووووووي وعيني مبطلتش عياط بس كنت من جوايا واثقه اني مش ههون على ربنا
ماما دخلت عليا طبطبت عليا ومسحت دموعي وعيطت هي كمان علشان شيفاني في الحاله دي
قولتلها يا ماما انتي تعبانه علشاني ومش هاين عليكي تشوفيني كده بس ربنا بقى اكتر منك وانا متاكده انه مش هيسيبني وهيفرحني وهيعوضني عن كل دمعه نزلت مني وقولت ياااااااارب انت خدت مني الانسان ايلي حبني اوووووووي وحبيته واتعلقت بيه بس مش هعزه عليك
صحيت لقيت خطيبي ف وشي الساعه 7 الصبح وبيقولي مش هسيبك وهتغير وهعمل المستحيل علشانك واول المستحيل اني وافقت انك تنزلي تشتغلي طالما هتبقى فرحانه ومستعد اضحي باي حاجه علشانك
لقيت نفسي بعيط
بس المرادي من الفرحه وسجدت وقولت ياما انت كريم يارب
وجريت على ماما قولتلها شوفتي مش قولتلك ربنا مش هيسيبني كده
بصراحه مش عارفه ايه الحكمه من ايلي حصلي كده وبرده مش عارفه نصيبي مع خطيبي دا ولا مع غيره
بس كفايه ان ربنا فرحني ولو للحظات
وحسيت ان ربنا حسسني انه اخد خطيبي مني علشان يختبر حبي لربنا ياترى بحب ربنا اكتر ولا خطيبي لاني عارفه ان ربنا بيغير على قلب عباده
بس والله والله والله يابنات الدنيا دي قصيرة اوعي تعزي على ربنا حاجه خليه هو الاول ف قلبك وف حياتك

وخليكي ديما بترددي (ان مع العسر يسرا ..ان مع العسر يسرا)
مقالش بعد العسر يسرا لالالالالالالالا مع العسر يسرا
ورددي ديما الايه ايلي كل اما اسمعها اعيط: ( ولسوف يعطيك ربك فترضى) ياااااااه على جمال الايه دي بحبها اوووووووووي وبتفائل بيها جداااااا
واعرفي انك مستحيل تحسي بفرحه الا لو زعلتي وعيطتي وحسيتي بضيق
وقتها اقل حاجه هتخليكي طايرة من الفرحه زيي كده
وهتحسي بحلاوة الصبر اووووووي لما تصبري بجد وصح وتلاقي تعويض عن صبرك من ربنا
انا كده خلصت ويارب تكون الرساله وصلت
الواجب :
كل بنوته دلوقتي حالا تقول حاجتين
اول حاجه مواقف هي صبرت فيها وربنا استجابلها وعوض صبرها خير زي مانا قولتلكم مليش دعوه
وتاني حاجه ان البنات ايلي جربوا يمشوا على خطه الاسبوع ايلي اتفقنا عليها الاسبوع ايلي فات
يقولوا حسوا بايه
بس بالله عليكم بصدق تقولوا النظام ريحكم يعني لما نظمتوا وقتكم ولا صليتوا قيام الليل واهتميتوا شويا بصلة الرحم والرياضه وبنفسك
حسيتي بايه..في تغير في حياتك او قلبك ولا مش فارقه عادي؟