هنتكلم في حاجه هتخليكي تقوي على الطاعه وتغلبي الشيطان صح

انهارده يابنات مش هنتكلم عن العبادة بطريقة مباشرة زي كل مرة
بس هنتكلم في حاجه هتخليكي تقوي على الطاعه وتغلبي الشيطان صح
جايز في يوم من الايام توصلي زي سيدنا عمر بن الخطاب ايلي بيخاف منه الشيطان ولما كان بيمشي في طريق ,الشيطان يمشي من طريق تاني....ليه منوصلش لكده يعني ..ليه معندناش الغيرة الحلوة دي؟
مانتي لو حطاها في دماغك هتجبيها صدقيني

بس خدي بالك... في حاجه اقوى من الشيطان ممكن تتسببلك في معصية كبيرة
هي نفســـــــــــــــــك....انتي يعني
ايه يانسمة الكلام دا؟؟ بلاش تأليف
والله يابنات مش تأليف..دا كلام ربنا وهوريكم الدليل
مش انتي عارفه ان في رمضان ربنا بيصفد الشياطين؟؟؟
اه طبعا حاجه معروفه
طب عمرك سالتي نفسك الجرائم ايلي بتحصل في رمضان دي مين وراها طالما مفيش شياطين؟؟
بلاش الجرايم ملناش دعوة
انتي انتي ايوة انتي عايزة تقنعيني انك في رمضان الاستقامه واخده حدها معاكي صح؟ يعني بتقعدي 30 يوم من غير كدبة؟؟
من غير ما تغتابي جارتك ولا صحبتك ولا فلانه؟
من غير ما تتريئي على حد؟؟
من غير ما تسمعي ولو اغنيه كده ولا كده؟
من غير ما تفوتي صلاة او تاخري صلاة او تجمعي صلاة؟
جاوبيني بتعملي كده في رمضان بالله عليكي؟
للاسف لا محدش بيقدر يستقيم في رمضان طول ال30 يوم ويقعد كل ثانيه في طاعه لربنا الا من رحم ربي
طب دا من ايه؟ ومفيش شيطان اهو وربنا هو ايلي قال ؟
من ايه ماتجاوبيني ...مش انتي بتتحججي بالشيطان..ماهو رمضان اهو بييجي 30 يوم ومفيش فايده برده بتغلطي...يبقى المشكله فين بقى
فيكي انتي
بمعنى اصح(في نفســـــــــك)


في بنات كتييييييييييييييييييير يمكن انتي تكوني منهم بيقولوا ايه:
انا مش عارفه مالي يعني ممكن تلاقيني بقرا اهو المحاضرة دلوقتي ومفيش نص ساعه انسى كل دا ولا الهوا وارجع زي ماكنت!!!
طبعا معاكي حق لانك ضعيفة... نفسك مقيداكي سجناكي في غفلتك...انتي اسيرة لنفسك ...مش عارفه تقوليلها ولو مرة واحدة لأ مش هسمع كلامك بقى كفاية انا هسمع كلام ربنا


طيب اكيد انتي دلوقتي بتسالي اسئله كتير ومن ضمنها :ازاي اعرف ان الوسوسة من الشيطان ولا من نفسي؟
هقولك ببساطه
الشيطان بييجي يقولك على معصية زي مثلا ييجي يقولك:بقولك ايه متسمعيش كلام باباكي ولا مامتك ..دول دقه قديمه سيبك منهم
هتيجي انتي مثلا تقولي اعوذ بالله من الشيطان الرجيم
خلاص كده انتي رفضتي الشيطان ...اهو مشي وسابك بس هيرجعلك تاني بمعصية جديدة وهكذا
لان هدف الشيطان مش انه يوقعك في معصية بذاتها
لا ...هدفه يخليكي تغلطي وتعملي معاصي على اي شكل وباي طريقه المهم ينجح في خططته
وانتي مجرد ما تقولي اعوذ بالله من الشيطان الرجيم وتحصني نفسك ...خلاص مش هيضرك مهما عمل

انما مين بقى ايلي بيخلي معصية(معينه) تحلى في عينك؟؟
هي نفسك انتي
ليه بقى؟؟؟؟؟؟؟؟؟؟؟؟؟؟؟؟؟؟؟؟؟؟؟
هقولك حوار ديما يحصل جواكي من غير ما تحسي بينك وبين نفسك وبين الشيطان:
الشيطان: بقولك ايه يانسمة ايه رايك تجربي كده تتكلمي مع شاب وتعيشي حياتك او تجربي البسي لبس روش كده ايه الخنقة ايلي انتي لبساها دي مفيش عرسان هيجولك كده ياهبله..او اتصلي بصحبتك اقعدي ارغي معاها عن صحبتكم الخنيقه التانيه دي... او سيبك سيبك متصليش دلوقتي خليكي بتتفرجي لحسن اللقطه دي هتفوتك وهتندمي..او متصحيش تصلي الفجر ياشيخه الجو برد اصلا نامي وربنا هيسامحك ... او او او او

نسمة:اعوذ بالله من الشيطان الرجيم...لالا مش هعمل كده حرام
الشيطان كده انصرف في اللحظه دي وسابك بقى مع نفسك
نفسك: جرالك ايه يابنتي ايه الكلاكيع دي فكي كده بلاش عقد وكلام كبير عيشي حياتك فيها ايه يعني ما تخرجي مع الشباب ولا متسمعيش كلام اهلك او جوزك ولا تلبسي على الموضة زي البني ادمين!!! ولا تشتمي صحبتك او تتكلمي عنها وحش ما هي المستفزة بصراحه ولا تفوتي صلاة خلاص يعني الايمان مقطع بعضه ياست الشيخه!!!!

بناااااااااااااااااااااااااااااااااات
اللحظه دي بقى هنا حاسمة
لو نسمة سمعت كلام نفسها خلاص هي كده ضاعت..وفعلا متلومش غير نفسها ...نفسها هي ايلي ضيعتها كده ..
انما بقى لو نسمة قالت لنفسها اخرسي خالص اعوذ بالله منك مش هسمع كلامك لان ليا عقل اعرف بيه الصح من الغلط وليا رب يوجهني للصح
خلاص كده نسمة فازت بنفسها

يارب تكونوا فهمتوا المعنى ايلي عايزة اوصله


نيجي بقى لانواع النفس: 3 انواع ربنا ذكرهم في القرءان
1/ النفس الامارة بالسوء
{وَمَا أُبَرِّئُ نَفْسِي إِنَّ النَّفْسَ لأَمَّارَةٌ بِالسُّوءِ إِلاَّ مَا رَحِمَ رَبِّيَ إِنَّ رَبِّي غَفُورٌ رَّحِيمٌ}
دي بقى النفس الشريرة ... الناس ايلي بتحب الشر ...زي ما بتقولي كده على حد دا بني ادم مؤذي ربنا ينتقم منه
طبعا الحمد لله مش في حد مننا وانا متاكده

2/النفس اللوامة
لا أقسم بيوم القيامةولا أقسم بالنفس اللوامة
النفس دي بقى يابنات بتقعد تلوم صاحبتها على كل حاجه بتعملها من ساعه ما تقوم من النوم لحد ما تنام
وتقعد تقولها ليه عملتي كده وتخليها تندم

3/النفس المطمئنة
اااااااه دي اعلى درجات النفس ...ربنا بيحبها اووووووووووووي
تخيلي ان النفس دي اعز الى الله واحب الى الله من الكعبة!!!!
لانها مستقر النور في الارض..نفس خاشعة..متوكلة على الله..تشتاق الى الله...تأنس بالله
وربنا كرمها وقال عنها: يا ايتها النفس المطمئنه ارجعي الى ربك راضية مرضيه فادخلي في عبادي وادخلي جنتي
يابنات حطيها حلقة في ودانك..ايلي يعرف ربنا ميخسرش ابدااااااااا
وعلشان تعرفي ربنا لازم تحاربي نفسك لو بتحلي معصية في عينك
لازم توقفيها عند حد ...نفسك دي اقوى من الشيطان نفسه

وساعات انتي في اليوم الواحد ممكن تبقى ال3 حالات دول!!!!
هقولك ياستي ازاي
تصحي من النوم عادي نفسك مطمنه هادية تصلي كده بخشوع وتدعي ووو
مجرد ماتزلي من بيتك رايحه الشغل ولا الجامعه ولا المدرسة العفاريت تمسكك تحسي انك مش طايقه حد ولا طايقه نفسك وعايزة تمسكي اي حد تتخانقي معاه ههههه(بتتخانقي مع دبان وشك يعني) دي كده امارة بالسوء
ترجعي بيتك بليل تحسي بتانيب ضمير على لفظ قولتيه لحد او خناقه او حاجه عملتيها غلط(دي كده نفس لوامه)

ها انتي انهي نوع في دول؟؟
مش عارفه يانسمة بس انا اوقات بحس نفسي مش ولا نوع في دول!!!
لا ابوس ايدك اوعي تقولي كده
مانتي لو مش لاقيه نفسك فيهم يبقى انتي النفس الرابعه ايلي من كتر ما ربنا بيستحقرها مذكرهاش في القرءان!!!
ايه النفس الرابعه دي يانسمة ربنا يستر؟
النفس الغافلة
يعني ايه يانسمة
يعني ولا هي بتعمل خير ولا بتعمل شر
عايشة وخلاص يعني وبيقولوا اهي عيشة والسلام وايام وبنعيشها !!!!
ملهية في تربية العيال وشغل البيت...ملهية في المذاكرة والدراسه ..ملهية في الفسح والخروجات والفيس بوك والكلام مع الشباب..ملهية عن مصحفها وطاعتها لربها وخشوعها في صلاتها..ملهية عن كل حاجه
النوع دا يابنات لامنه كسب الدنيا ولا منه هيكسب الاخرة ...خسرتي كل حاجه بسبب غفلتك دي ..
نوع النفس دي الشيطان حتى مش بيقربلها!!!!!
نعم يانسمة؟؟؟
اه والله وهقولك ليه
لانك كده كده غافله لا بتذكري الله ولا بتقري قرءان بتدبر او مش بتقري اصلا ولا بتصلي بخشوع او مش بتصلي اصلا..كل همك في الحياة اتخرج اشتغل اجيب فلوس اتجوز اخلف اربي العيال اعلمهم بفلوسي اجوزهم كمان بس كده اطمنت عليهم يلا هنموت بقى
طب الشيطان هيقربلك ليه..مانتي كده كده بتطيعي الشيطان من غير ما يتعب نفسه ويوسوسلك...هدف الشيطان الاساسي ان يلهيكي عن ربنا عن فرحتك بالقرب من ربنا عن اشتياقك لما تحسي انك بعدتي شويا عن ربنا..فانتي كده كده ملهيه من غير ما الشيطان يتعب نفسه معاكي
فالشيطان هيحاول ميوقعكيش في معاصي
لسبب بسيط لانك لو وقعتي في معصية ممكن تلومي نفسك وتبدئي تفوئي من غفلتك وتتوبي وترجعي لربك
علشان كده الشيطان مش بيقربلك
وانتي لاحول ولا قوة مبتعمليش معاصي اه
بس يافرحتي
شوفي ربنا بيقول عنك ايه: لَهُمْ قُلُوبٌ لا يَفْقَهُونَ بِهَا وَلَهُمْ أَعْيُنٌ لا يُبْصِرُونَ بِهَا وَلَهُمْ آذَانٌ لا يَسْمَعُونَ بِهَا أُوْلَئِكَ كَالأَنْعَامِ بَلْ هُمْ أَضَلُّ أُوْلَئِكَ هُمُ الْغَافِلُونَ
يعني حتى الانعام في الحالة دي ربنا فضلهم عنك
يااااااااااااااااااااا للدرجه دي
ايوااااااااااااا واكتر ...الموضوع خطير يابنات مش سهل ارجوكي خدي بالك من نفسك جاهديها على اد ما تقدري
قوليلها لا ولو مرة.


دقيقة......
دلوقتي حالا حددي نوع نفسك؟ تحبي لنفسك تكون ايه؟ وهتعملي ايه علشان توصليلها؟
حددي ذنوبك..يعني ليكي ذنب معين بتعمليه علطول مش عارفه توقفيه؟؟
زي مثلا غض النظر/كلامك مع شاب/معاملتك لاهلك وجوزك/بتسيبي صلاة الفجر/بتاخري الصلاة/مش محجبة/لبسك مش ملتزم او في حاجه عايزة تغيريها للاحسن/بتغتابي الناس
ها حددتي نفسك ؟ عرفتي عايزة انهي نفس؟ حددتي ذنبك؟

طيب تعالي بقى هقولك 5 حاجات لو عملتيها هتبقى عند ربنا ربانية
استني الاول انتي عارفه يعني ربانية؟؟؟ متقريهاش وتعديها كده مينفعش فكري فيها الاول وراكي ايه يعني
العبد الرباني يابنات يعني العبد ايلي تعلق قلبه بالله وجاهد نفسه وشيطانه عن المعاصي يعني اكيد كان بيضعف في لحظات ويعمل معاصي بس كان بيتوب ويراجع نفسه ويرجع لطريقه بسرعه لحد ما الشيطان بقى يخاف يقربله اصلا ولحد ما بقى رباني يعني ربنا بيحبه لو قولتي انا عايزة كذا من قبل ما تكملي ربنا هيديهالك

طيب يانسمة قولي شوقتينا ياريت ابقى ربانيه بس اعمل ايه؟
ياحبيبتي ماهو انتي لما تجاهدي نفسك وشيطانك شويا شويا هتلاقي نفسك غصب عنها سكتت وهديت ومبقتش تطلب شهوة او معصية وبالتالي هتبقى ربانية...
طب نسمة اجاهد نفسي ازاي يعني؟
بصي ياقمر
ابن القيم بيقولك ان فيه 14 نوع من انواع الجهاد من ضمنهم الجهاد في سبيل الله وجهاد النفس
ليه قولت الجهاد في سبيل الله!!!!! علشان اقولك ان جهاد نفسك دا مهم اد ايه لدرجة انه اتحط مع الجهاد في سبيل الله!!
نيجي لمجاهدة النفس 5 انواع لو عملتي نوع منهم = جهاد للنفس
لو عملتي الخمسه= عبد رباني

1/مجاهدة الشهوات(متستسلميش لشهواتك مهما كانت)
2/مجاهدة النفس في تعلم العلم(اتعلمي دينك اعرفي تفتحي المصحف ازاي وتقري ازاي عيب عليكي يعني...اتعلمي حاجه تنفعك لدينك واخرتك وعلى فكرة دا ايلي احنا بنعمله سوا في كل محاضرة)
3/مجاهدة النفس في العمل بما تعلمت(يعني ايلي انتي اتعلمتيه دا وبتتعلميه لسه معانا اعملي بيه اغصبي على نفسك قاومي قوليلها لا مش هضعفلك انا هقوى علشاني وعلشان ربنا وعلشان اخرتي)
4/دعوة الناس الى العمل بما تعلمتي(يعني اتعلمتي اهو حاجه وعملتي بيها..حاولي بقى تدعي اهلك صحابك جوزك اي حد ...حاولي تعلميه ايلي انتي اتعلمتيه..اوعي تشوفي غلط وتسكتي..المؤمن الصح ميقولش انا مالي!!...علميهم لو فشلتي ادعيلهم بالهدايه من قلبك)
5/الصبر على مشاق الدعوة(النقطه دي مهمه اوووووي)
انا هفهمك
انتي مثلا دلوقتي مكنتيش محجبة او كان لبسك ضيق وحرام وجيتي اتغيرتي واتحجبتي او غيرتي ستايل لبسك وبقى مش بيغضب ربنا
هتلاقي الناس حواليكي بتقولك ليه كده ياحبيبتي دانتي كنتي زي القمر/دانتي لسه صغيرة على اللبس دا/صحابك هيتريئوا عليكي /اهلك هيقفوا قصادك
وانتي من جواكي صابرة على كل داJ
ياااااااااااااااااه لو حد يقدر يعمل ال 5 حاجات دول
انتي كده بتعملي قمة الدين اعلى حاجه في الاسلام اوعي تقللي من الكلام دا اوعي

بصي احد التابعين بيقول ايه: (ان اول شئ يستحق ان تجاهده..نفسك التي بين جنبيك فانك ان انتصرت على نفسك كنت على غيرها اقدر..وان هزمت امام نفسك كنت عن غيرها اعجز)
يعني انتصري على نفسك= هتنتصري على الدنيا بما فيها


انا كده خلصت الحمد لله
وعلشان محدش يبقى تايه
كل الكلام دا هدفي منه اعرفك اد ايه نفسك دي ممكن توديكي في داهية وتقرفك وتسببلك خنقه وملل
واد ايه برده ممكن نفسك دي تبقى سبب لدخولك الجنه وفرحة قلبك في الدنيا والاخرة كمان

حددي نوع نفسك وحطيلك هدف عايز توصليله وحددي ذنوبك بورقة وقلم وحاربي وقاومي على اد ما تقدري لحد ما تخلصي من الذنب دا علشان ساعتها بس تبقى حبيبة ربنا
كلمة حلوة صح؟

حاجه اخيرة
انتو طلبتوا اننا نتكلم شويا عن المعامله وكده
فعلشان كده هنعمل ايه بقى
هنخصص محاضرة عن العباده
ومحاضرة عن المعامله يعني نعرف سوا ازاي نتعامل مع الناس كلها بمختلف اعمارهم وازاي تقوي شخصيتك وحاجات كتير مش وقتها دلوقتي علشان مطولش اكتر من كده
وهنخلي بعد كل محاضرة عن المعامله دي نفتح باب المناقشه بعدها بينا علشان اي بنوته عندها استفسار او مشكله نساعدها باذن الله
يبقى كده هنعتبر دي اول محاضرة في سلسله المعامله والسلوك

الواجب: مفيش بس بالله عليكي اقفي وقفة مع نفسك وحددي ذنوبك وقرري انك هتبطليها وهتحاربي نفسك من دلوقتي

ومتنسوش تقرير الصلاة لان في بنات مش بتكتب تقريرها...مش عايزين كسل بقى يلاالمحاضرة الجاية مهمه يابنات:عايزة تحسي براحه بال وسعادة فظيعه...اذكري الله